TAT103  Arkitektateikning

Undanfari: TÞT 103

 

Í áfanganum fer fram kynning á gerð arkitektateikninga í sinni einföldustu mynd á grundvelli hefðbundinna staðla og teiknireglna. Áhersla er lögð á að efla skilning nemenda á rýmum út frá tvívíðum teikningum en einnig læra nemendur að vinna teikningar út frá þrívíddarlíkönum. Fjallað er um hús og húshluta og vinna nemendur að athugunum og uppmælingu á stærð og hlutföllum og gera teikningar af niðurstöðum sínum. Fram fer kynning á mismunandi mælikvörðum, númerakerfi, hugtakanotkun hönnunar og notkun ýmissa mælitækja. Ennfremur er fjallað um mikilvægi lagskiptinga, merkinga, línugerða og upplýsinga sem þurfa að vera á arkitektateikningum. Þá eru kynnt helstu byggingarefni sem notuð eru í frístundahús og lítil einbýlishús og húshluta sem heyra undir arkitektateikningar.

 

TAT203  Arkitektateikning

Undanfari: TAT 103

Í áfanganum er lögð áhersla á að dýpka þekkingu og skilning nemenda á gerð flóknari arkitektateikninga á grundvelli hefðbundinna staðla og teiknireglna og kynna þeim almennar kröfur um gerð aðalteikninga. Kynnt er bygginga- og brunamálareglugerð og fjallað um hvernig ákvæði þessara reglugerða eru uppfyllt á teikningum og öðrum fylgigögnum. Farið er dýpra í vinnu varðandi lagskiptingu, merkingar, línugerðir og aðrar mikilvægar upplýsingar sem þurfa að vera á arkitektateikningum. Einnig er fjallað ítarlega um notkun og útfærslu helstu byggingarefna.  Ætlast er til að nemendur þjálfist í samræmingu teikninga og teiknikerfa, vinni með númerakerfi, lagskiptingar, utanaðkomandi tilvísanir og þjálfist í vinnu með mismunandi mælikvarða samkvæmt íslenskum stöðlum sem notaðir eru við byggingar og mannvirkjagerð. Útprentun teikninga og samsetning teikningasetta æfð ásamt innsetningu í skjalavistunarkerfi.

 

TAT303  Arkitektateikning

Undanfari: TAT 203

 

Í áfanganum fá nemendur þjálfun í frekari vinnslu teikninga á grundvelli teiknireglna og íslenskra staðla þar sem gögn frá landupplýsingum, innsetningar loftmynda og korta og önnur upplýsingagögn koma við sögu. Áfanganum er einnig ætlað að dýpka skilning á flóknari arkitektateikningum auk þess að veita meiri þjálfun í því að leysa hönnunarverkefni sem útfærð eru í þrívídd. Lögð er áhersla á frágang arkitektateikninga til áritunar hönnuða í samræmi við kröfur um frágang teikninga og gagna sem þeim fylgja. Þá er lögð áhersla á að nemendur þjálfist í að afla upplýsinga- og gagna hjá stofnunum og embættum og nota í frekari úrvinnslu teikninga.

 

TBT103  Burðarvirkis- og byggingahlutateikning

Undanfari: TTC103

 

Áfanganum er ætlað að kynna gerð einfaldra burðarvirkis- og byggingahlutateikninga á grundvelli hefðbundinna staðla og teiknireglna auk reglugerða og almennra krafna um frágang og gögn sem burðarvirkis- og byggingahlutateikning byggir á. Í áfanganum fræðast nemendur um hús, húshluta og mannvirki í smíðum með skoðun og uppmælingu þeirra og síðan uppteikningu. Fjallað er um mismunandi mælikvarða, númerakerfi, hugtakanotkun og annað sem tilheyrir burðarvirkis- og byggingahlutateikningum. Þá er fjallað um mikilvægi lagskiptinga, merkinga, línugerða og upplýsinga sem þurfa að vera á burðarvirkis- og byggingahlutateikningum. Nemendur kynnast helstu byggingarefnum sem notuð eru í mannvirki, hús og húshluta sem heyra undir burðarvirkis- og byggingahlutateikningar og þjálfast í að lýsa byggingahlutum út frá tvívíðum teikningum.

 

TBT203  Burðarvirkis- og byggingahlutateikning

Undanfari: TBT103

 

Áfanganum er ætlað að auka innsæi og skilning á gerð flóknari burðarvirkis- og byggingahlutateikninga á grundvelli hefðbundinna staðla og teiknireglna.

Fram fer kynning á reglugerðum og stöðlum og hvernig ákvæðum þeirra er framfylgt á teikningum og öðrum fylgigögnum. Kynntar eru þær stofnanir, embætti og ráð sem hlutast til um gerð burðarvirkis- og byggingahlutateikningar og fjallað um hlutverk þeirra í hönnun og mannvirkjagerð. Fjallað er ítarlega um lagskiptingu, merkingar, línugerðir og aðrar mikilvægar upplýsingar sem tilheyra gerð burðarvirkis- og byggingahlutateikningar. Einnig er nánar kynnt notkun og meðhöndlun helstu byggingarefna í tengslum við burðarvirkis- og byggingahlutateikningar. Ætlast er til að nemendur þjálfist í samræmingu teikninga og vinni með númerakerfi og lagskiptingar og þjálfist í vinnu með mismunandi mælikvarða samkvæmt íslenskum stöðlum um byggingar og mannvirki. Þá er kynnt notkun utanaðkomandi tilvísana og samskiptatækni milli teikninga.

 

TBT303  Burðarvirkis- og byggingahlutateikning

Undanfari: TBT203

 

Áfanganum er ætlað að dýpka innsæi og skilning á gerð og frágangi flókinna burðarvirkis- og byggingahlutateikninga þannig að nemandinn geti sjálfstætt valið og notað samsetningaraðferðir byggingahluta með tilliti til áhrifa álagskrafta. Að auki á nemandinn að geta metið stífingakerfi bygginga og leyst einföld reikningsdæmi svo sem þakhalla og skáa í samvinnu við aðra. Gera skal grein fyrir efnisnotkun með áherslu á mikilvægi þess að framfylgja gildandi reglum og því að uppfylla öryggiskröfur og staðla sem kveða á um notkun efna og meðhöndlun þeirra. Farið er ítarlega í notkun á utanaðkomandi tilvísunum og samskiptatækni á milli teikninga með tilliti til öflunar og notkunar upplýsinga í öðrum teikningum.

Þá er útprentun teikninga þjálfuð ítarlega.

 

TTF103  Fjarvíddar og fríhendisteikning

Undanfari: Enginn

 

Í áfanganum læra nemendur grunnatriði fríhendis og fjarvíddarteikninga. Lögð er áhersla á að nemendur öðlist almenna undirstöðuþekkingu og þjálfun í gerð tvívíðra og þrívíðra fríhendisteikninga og myndrænni framsetningu viðfangsefna. Nemendur þjálfast í að meta hlutföll og gera greinargóðar rissmyndir með málsetningum. Þjálfaður er formskilningur og greining einfaldra forma svo sem kassa og kúluforma. Nemendur teikna myndir úr umhverfinu bæði utan- og innanhúss og læra þannig forsendur m.a. tveggja punkta fjarvíddarteikninga. Þeir fá ennfremur undirstöðukennslu í lita og áferðarfræði. Áfanginn er undirbúningur undir frekara nám í teiknifræðum.

 

TGF103  Grafísk framsetning

Undanfari: TTF103

 

Í áfanganum eru kynnt undirstöðuatriði í tvívíðri formfræði og litafræði. Kennd eru hagnýt atriði í grafískri útlitshönnun (layout). Auk grunnatriða grafískrar framsetningar er lögð áhersla á útlitshönnun, typógrafíu, texta og prentað efni á teikningasettum, möppum, veggspjöldum og smærri sýningum.  Aðaláhersla er á form- og litafræði og verkefnavinnu sem snýr að útlitshönnun á teikningasettum/möppum, útlitshönnun á veggspjöldum og uppsetningu smærri sýninga og f.l. Fjallað er um liti og hvernig hægt er að nota þá til þess að koma ákveðnum boðum til skila í hönnun. Einnig er fjallað um leturgerðir með margs konar merkingar í huga. Grafísk forrit eru kynnt, ennfremur forrit tengd hönnun og framleiðslu. Þá eru ýmis jaðartæki kynnt eftir þörfum.

TGT103  Grunnteikning

Undanfari: Enginn

 

Í áfanganum er lögð áhersla á að nemendur öðlist almenna undirstöðuþekkingu og þjálfun í teiknifræðum. Nemendur læra grunnatriði fallmyndunar með áherslu á hornrétta fallmyndun marghliða mynda þ.m.t. fram-, hliðar- og ofanmyndir auk sneiðinga. Þeir læra hornrétta fallmyndun ásmynda, þ.m.t. samkvarðamyndir, tvíkvarðamyndir og þríkvarðamyndir, auk skámyndunar. Þá þjálfast þeir í meðferð og notkun mæli- og teikniáhalda, textagerða og málsetninga í tölvuteikningu og myndrænni vinnu með viðfangsefni starfsgreina, lestur teikninga og grunnþjálfun í gerð einfaldra teikninga og þrívíðra teikninga.

 

TÆT103  Gæðavitund gæðastjórnun

Undanfari: Enginn

 

Nemendur kynnast grundvallarhugtökum gæðavitundar og gæðastjórnunar og þeim gert ljóst hvers vegna fyrirtæki taka upp gæðakerfi og sækjast eftir vottun. Fjallað er um hvaða áhrif gæðakerfi getur haft á starfsumhverfi og starfsháttu. Fram fer kynning á helstu skjalavistunarkerfum, gagnaumsýslukerfum og ljósritunaraðferðum. Fjallað er um helstu starfshlutverk sem bíða nemenda í atvinnulífinu og hvaða verkþáttum gæðastjórnunar þau tengjast. Lögð er áhersla á gæðahandbók og skjalavörslukerfi sem grundvöll að skipulögðum vinnubrögðum sem auðvelda samskipti starfsfólks, samhæfð vinnubrögð, skilvirkni og samræmt verklag. Áfanganum er ætlað að efla skilning nemenda á því að markvissar og stöðugar innri umbætur viðhalda háu þjónustustigi og gæðum gagnvart viðskiptavinum fyrirtækjanna.

 

TVT103  Hönnunar- og tækjateikning véla

Undanfari: TTC103

 

Áfanganum er ætlað að kynna undirstöðuatriði í gerð teikninga tækja og véla.

Í áfanganum fá nemendur grunnþjálfun í gerð teikninga tækja og véla auk vélahluta á grundvelli hefðbundinna staðla og teiknireglna ásamt þjálfun í að uppfylla almennar kröfur og reglugerðir við gerð vélateikninga. Í áfanganum kynnast nemendur einfaldri uppbyggingu véla og tækja og skoða einstaka hluta þeirra. Þeir læra að þekkja mismunandi mælikvarða, númerakerfi, hugtakanotkun og annað sem tilheyrir véla- og tækjateikningum. Fjallað er um mikilvægi fall- og skurðmynda, skástrikana og málsetninga í vélateikningu. Nemendur læra að þekkja mismunandi gerðir skrúfgangs, mælieiningar og læra að þekkja og nýta sér helstu mælitæki. Kynntar eru óbeinar mælingar með ýmsum mælitækjum til uppmælinga á helstu véla- og tækjahlutum við lausn verkefna. Þá eru kynnt sértæk vélateikniforrit, eins og AutoCAD og Mechanical eða Inventor.

 

TTI103  Innréttingateikning

Undanfari: TTC103

 

Áfanganum er ætlað að efla skilning á gerð innréttingateikninga á grundvelli hefðbundinna staðla og teiknireglna ásamt því að uppfylla almennar kröfur og reglugerðir við gerð slíkra teikninga. Nemendur fást við rými til uppmælinga þar sem ætlunin er að koma fyrir innréttingum og vinna síðan að uppteikningu slíkra rýma með innréttingum. Þá eru kynnt sérstök innréttingateikniforrit.

 

TTL103  Lagnateikning

Undanfari: TTC203

 

Í áfanganum eru kynnt undirstöðuatriði í gerð teikninga vatns,- hita,- frárennslis- og loftræsilagna. Nemendur fá grunnþjálfun í gerð slíkra teikninga á grundvelli hefðbundinna staðla og teiknireglna ásamt þjálfun í að uppfylla almennar kröfur og reglugerðir við gerð slíkra teikninga. Þeir læra um vatns- og hitalagnir í húsum og mannvirkjum og skoða frárennslis- og loftræsilagnir húsa og mannvirkja í smíðum. Fjallað er um mismunandi mælikvarða, númerakerfi, hugtakanotkun og annað sem tilheyrir lagnateikningum. Lögð er áhersla á mikilvægi lagskiptinga, merkinga, línugerða og upplýsinga sem þurfa að vera á lagnateikningum. Einnig kynnast nemendur helstu efnum sem notuð eru í mismunandi lagnir í hús og mannvirki. Þá eru kynnt sértæk lagnaforrit og samsetning teikninga á milli teikniforrita.

 

TLV106  Lokaverkefni 

Undanfari allir áfangar TT/ hliðarfari TAT303 og TBT303.

 

Áfanginn á að gera nemandanum mögulegt að sýna getu sína og hæfni til að vinna heildstætt verkefni sem tengist vinnumarkaðnum, sjálfstætt með ráðgjöf. Að auki er áfanganum ætlað að þjálfa nemandann í gagnaöflun og því að kynna og útskýra vinnu sína fyrir öðrum. Nemandi velur fagsvið og leitar til fyrirtækis eða vinnustaðar t.d. á sviði raflagna, bygginga, mannvirkja eða véla til að fá úthlutað hæfilega stóru verkefni til að vinna á einni önn. Æskilegt er að nemandinn geti fengið faglega aðstoð eða leiðsögn að einhverju leyti hjá viðkomandi fyrirtæki. Nemandinn vinnur síðan að mestu leyti sjálfstætt undir eftirliti og ráðgjöf kennara og/eða ráðgjafa frá viðkomandi fyrirtæki.           Áhersla er lögð á að nemandinn beiti þekkingu á hefðbundnum vinnuaðferðum og útfærslum innan fagsviðsins: magntökur, verðútreikningar, tilboð, mælingar, efnisval, frágangur o.fl. Gerður er þríhliða samningur milli nemanda, fyrirtækis og skóla  áður en verkefnavinnan hefst.  Verkefnið þarf ekki að vera bundið við teiknivinnu eingöngu heldur getur nemandi aflað sér verkefnis t.d. verktökum, framleiðslufyrirtækjum og stofnunum þar sem unnið er eftir teikningum og hönnun annarra ef verkefnin eru þess eðlis að reyni á fagþekkingu hans. Áhersla er síðan lögð á að fagþekking nemandans endurspeglist í framsetningu teikninga, efnisvali, áferð, litavali og lýsingum svo eitthvað sé nefnt, allt eftir því á hvaða sviði lokaverkefnið er. Ekki er ástæða til að útiloka neitt fyrirfram sem mögulegt lokaverkefni og gæti það þess vegna verið  sýndarveruleiki þar sem  teikningar eru settar inn í þrívíðar myndir og myndraðir sem mynda hreyfimyndir af tölvulíkani til að auðvelda hönnuðum, notendum og verkkaupum skilning og yfirsýn  yfir hönnunina.

 

TMM103  Myndataka og myndvinnsla

Undanfari: Enginn

 

Í áfanganum eru kynnt undirstöðuatriði í myndvinnslu og stafrænni myndatöku og vinnsla í myndvinnsluforritum. Fjallað er um meginatriði stafrænnar tvívíðrar myndvinnslu og kennd helstu tæknibrögð og beiting verkfæra sem við eiga á því sviði. Fjallað er um lagfæringar og breytingar á myndum, vistun þeirra og frágang á veraldarvef og mismunandi leiðir til prentunar. Þjálfuð er afmörkun myndhluta, litun mynda og sýnd notkun laga, maska og leturgerða. Unnið er með mismunandi myndsnið, litakerfi og upplausn mynda. Jafnframt er þjálfuð  skönnun mynda í borðskanna og fjallað um hvernig hámarksgæðum er náð. Í áfanganum er lögð áhersla á grafíska útlitshönnun (layout). Auk grunnatriða í stafrænni myndatöku er lögð áhersla á hagnýt viðfangsefni eins og nærmyndatökur, myndatöku af líkönum, rýmis- og umhverfismyndatöku og myndatöku af teikningum sem eru of stórar fyrir skönnun.

 

TRT103  Raflagnateikning        

Undanfari:         TTC 103

 

Í áfanganum er lögð áhersla á að nemendur tileinki sér undirstöðuþætti raflagnateikninga og nái að fylgja ákvæðum reglugerða og öryggisþátta við frágang þeirra.  Stefnt er að því að nemendur öðlist grunnskilning í rafmagnsfræði.  Jafnframt er lögð áhersla á að nemendur átti sig á tengslum mismunandi teiknireglna við verklegar framkvæmdir. Stefnt er að því að nemendur fái skilning í skipulagi og flokkun gagna við gerð raflagnateikninga.  Nemendur læra  um blaðstærðir, mælikvarða og teikniáhöld.  Einnig læra nemendur um íslenskan staðal um raflagnateikningar, gerðir teikninga og öll almenn teiknitákn.  Í þessum áfanga er lögð áhersla á nýtingu tölvutækni við gerð raflagnateikninga. Í áfanganum fá nemendur þjálfun í að teikna og lesa einfaldar raflagnateikningar. Fjallað er um mismunandi gerðir teikninga og öll almenn teiknitákn, teiknireglur smærri neysluveitna.

 

TRT203  Raflagnateikning        

Undanfari:  TRT 103

 

Í áfanganum er lögð áhersla á að nemendur efli enn frekar þekkingu og færni í undirstöðuþáttum TRT 103 og þjálfist í að beita þeim við raunhæf verkefni.  Fjallað er um samræmingu á teiknikerfum, númerakerfum, lagskiptingu, teikningarömmum, teikningahausum og mælikvörðum samkvæmt íslenskum stöðlum. Einnig er kennd meðhöndlun teiknigrunna, frágangur þeirra og vistun og  notkun á utanaðkomandi tilvísunum við gerð teikninga.  Nemendur fá þjálfun í að teikna lampaplön, afla upplýsingar á netinu um þá lampa (ljós) sem notaðir eru og koma þeim inn á teikningar. Nemandi fær þjálfun í að teikna og lesa flóknari raflagnir, bæði innfelldar og áfelldar. Nemendur  læra einnig að magntölutaka og kostnaðarreikna framkvæmdir.  

 

TST103 Skipulag og stjórnun

Undanfari: TAT103, 203

 

Áfanganum er ætlað að kenna nemendum að vinna verklýsingar og magntölur úr verkefnum sem þeir eru að vinna við í öðrum áföngum. Í áfanganum er lögð áhersla á að kenna skipulagningu verkgagna með tilliti til áframhaldandi vinnu við verklýsingar og magntölur. Lögð er áhersla á tölvuunna ritvinnslu og töflureikna, ásamt kynningu á verkáætlunarforritum. Nemendur læra að lesa úr verkáætlunum og vinnulýsingum þannig að þeir séu færir um að gera áætlanir í samræmi við eigin verkefni.

Ætlast er til að nemendur læri framsetningu verklýsinga og númerakerfi gagna.

Í áfanganum er nemendum kynnt mikilvægi réttrar uppbyggingar gagna og teikninga með réttum magntölum og efnisupplýsingum þannig að þeir verði síðan færir um að vinna verklýsingar út frá teikningum.

 

TTC103 Tölvuteikning

Samfara grunnteikningu TGR 103 og 203

 

Í áfanganum fer fram kynning á notkun helstu teikniforrita sem notuð eru við tækniteiknun. Lögð er áhersla á að efla skilning nemenda á rýmum út frá tvívíðum teikningum og kynnt eru grundvallaratriði við gerð þrívíðra teikninga. Nemendur læra grunnskipanir teiknikerfa með æfingum á tölvu og kynnast undirstöðu tölvuteikninga í teiknikerfum. Þeir þjálfast í að teikna flatarmyndir í tölvu með teikniforriti. Auk þess læra þeir að mæla upp hluti og teikna síðan á grundvelli hefðbundinna staðla og teiknireglna. Lögð er áhersla á þjálfun í lestri teikninga og mælikvarða, vinnu eftir málum og teiknireglum, notkun lagskiptinga, línugerða og merkinga sem og skölun teikninga og uppsetningu teikninga. Þá læra nemendur að setja saman og ganga frá teikningum vel framsettum til útprentunar og vistunar.

 

TTC203 Tölvuteikning

Undanfari tölvuteikning TTC 103

 

Áfanganum er ætlað að dýpka skilning á helstu teikniforritum og þjálfa nemendur í gerð viðameiri teikninga. Þeir læra að nota flóknari skipanir teiknikerfa með æfingum á tölvu og helstu verkþáttum tölvuteikninga í þrívíðum teiknikerfum. Nemendur þjálfast í samræmingu teikninga og teiknikerfa, vinna með númerakerfi, lagskiptingar, utanaðkomandi tilvísunarteikningar ("X-ref") og þjálfast í vinnu með mismunandi mælikvarða samkvæmt teiknistöðlum. Lögð er áhersla á að nemendur þjálfist í að skala til teikningar og nái góðri færni á skölun og uppsetningu. Þeir læra að búa til teikningaramma með tilvísunum og teiknibreytum ásamt töflugerð út úr slíkum teiknibreytum. Kynnt er samræming og samskipti á milli teikniforrita og annarra myndforma t.d. notkun ljósmynda með teikningum. Nemendur læra samsetningu teikninga úr mismunandi forritum og skráargerðum. Fjallað er um mismunandi teikniforrit og hvernig nota má og vinna með teikningar úr mismunandi forritum. Útprentun teikninga og samsetning teikningasetta er þjálfuð ásamt frágangi í skjalavistunarkerfi. Þrívíddarhugsun og teikning þrívíðra hluta er þjálfuð. Ennfremur samsetning teikninga til útprentunar og vistunar á mismunandi skráarformum.

 

TÞT103 Þrívíddarteikning

Undanfari: Enginn

 

Áfanganum er ætlað að kynna undirstöðuatriði í vinnu með þrívíð líkön sem síðan eru notuð til framsetningar á tví- og þrívíðum teikningum. Nemendur læra að nota stafræn þrívíddarteiknikerfi til framsetningar á hugmyndum og skissum.

Nemendur vinna með þrívíðar teikningar, breyta þeim og laga til á ýmsan hátt.

Nemendur læra á ýmsar stillingar og aðgerðir sem stafræn þrívíddarforrit gefa möguleika á, bæði fyrir þrívíða og tvívíða myndvinnslu og framsetningu. Byggð eru einstök þrívíð líkön og unnin heildstæð verkefni. Þá eru kynnt sértæk þrívíddarteikniforrit.

 

TÞT 203 Þrívíddarteikning

Undanfari: TÞT 103

 

Í áfanganum er fjallað um undirstöðuatriði vinnu með þrívíð líkön, birt sem myndgerðir og líkingar á fyrirhuguðu raun- og framtíðarútliti, til kynningar á hugmyndum - hvort sem um er að ræða tvívíðar myndir eða hreyfimyndir. Nemendur læra að nota stafræn þrívíddarteiknikerfi til að birta hugsanlegt raun- og framtíðarútlit til túlkunar hugmynda hönnuða. Nemendur móta eða setja upp þrívíddarlíkön, flytja þau á milli forrita til frekari úrvinnslu með yfirborð og efni í því skyni að skýra hönnunartillögu og sýna endanlegt útlit, til kynningar. Nemendur læra ýmsar stillingar og aðgerðir sem slík forrit gefa möguleika til fyrir þrívíða myndmótun. Unnið er með einstaka þrívíða líkanahluta, ennfremur heildstæð líkön til að vinna yfirgripsmeiri heildarlausnir verkefna. Kynnt eru sértæk þrívíddarforrit.

 

TUT103 Tölvuumsjón

Undanfari: enginn

 

Í þessum áfanga læra nemendur að nota tölvu á markvissan og nytsaman hátt. Kynnt eru grunnatriði netkerfa og mismunandi gerðir þeirra og lögð áhersla á mikilvægi vandaðra vinnubragða og öryggismála við uppsetningu netkerfa. Æfð er markviss notkun netkerfa. Fjallað er um upplýsingar af netinu, tilraun gerð til greiningar og metinn áreiðanleiki og meðhöndlun. Þjálfuð er notkun samskipta- og hópvinnuforrita og uppsetning aðgangsheimilda. Fjallað er um notkun gagnagrunnsforrita. Unnið er með úrvinnslu, uppsetningu, viðhald og tengingu jaðartækja.

 

---