Út er komin Saga Iðnskólans í Hafnarfirði, framsækins skóla í stöðugum vexti.

Ákveðið var í tilefni 75 ára afmælis skólans þann 11. nóvember 2003, að láta skrifa sögu skólans og var Lýður Björnsson sagnfræðingur fenginn til verksins.

Í bókinni er rakin saga skólans frá upphafi eða frá því að Páll Jónsson járnsmiður fékk Emil Jónsson, síðar forsætisráðherra til að standa fyrir námskeiðum fyrir iðnnema árið 1926, en tveimur árum síðar, þann 11. nóvember 1928 gengust iðnaðarmenn fyrir stofnun iðnaðarmannafélags og iðnskóla í Hafnarfirði. Í bókinni segir m.a. frá viðgangi skólans á árum áður, þeim breytingum sem átt hafa sér stað frá því að ríki og sveitarfélög tóku við menntun iðnnema og hvernig skólastarfið hefur vaxið og dafnað hin síðari ár. Þá er í upphafsköflum fjallað um iðnnám fyrr á tíð og hvernig það tengist atvinnustarfsemi í Hafnarfirði á liðnum öldum.

Bókin er ríkulega myndskreytt og með ítarlegum nafnaskrám.

Höfundurinn Lýður Björnsson, formaður skólanefndar skólans Björn Ingi Sveinsson og skólameistarinn Jóhannes Einarsson afhentu Þorgerði Katrínu Gunnarsdóttur menntamálaráðherra fyrsta eintak af bókinni í Menntamálaráðuneytinu í dag 30.11.2006.